自閉症譜系障礙（ASD）同專注力失調及過度活躍症（ADHD）係兩個不同嘅斷症，大約50%至70%患有ASD嘅小朋友可能同時擁有ADHD嘅特質，此為「共病」。雖然醫學界暫時未能夠解釋兩者並存嘅原因或關係，但相信同腦部及腦內神經傳遞物質失調有關。
一般嚟講，ASD嘅症狀會喺2至3歲左右開始較為明顯，例如較少同人有眼神接觸、社交能力較弱、興趣狹隘同有重複或固執行為；而ADHD嘅症狀則多數會喺5至6歲開始變得明顯，好似返學時好難集中精神、做嘢較為甩漏，經常坐唔定同有衝動嘅行為。
雖然ASD同ADHD小朋友有著完全不同嘅社交面貌，但如果兩者同時出現，佢哋嘅社交能力可能就會更差，而面對嘅挑戰亦會較多，甚至遇到欺凌；出現焦慮或負面情緒嘅風險亦會較高。