6歲嘅俊仔（化名）由細到大嘅社交能力都比較差，唔太識得同人溝通，每次同朋友仔玩，都會做出古怪或不恰當嘅行為，又容易衝動同發脾氣，仲成日坐唔定。直到升上小學，呢種情況開始變本加厲，例如破壞課堂秩序，而且會匿入枱底尖叫，呢啲行為令到其他同學仔望以生畏，唔敢同佢玩，於是俊仔就被人孤立。
老師認為俊仔有自閉症譜系障礙（ASD）與專注力不足及過度活躍症（ADHD）嘅症狀，建議俊仔父母帶佢去接受評估。經過臨床診斷，醫生發現俊仔係ASD伴隨ADHD，就建議佢透過藥物同行為治療慢慢糾正，感恩嘅係俊仔父母完全配合，俊仔經過一輪治療後，症狀得到改善，仲喺學校識到新嘅朋友仔添！
當ASD同ADHD同時出現，年紀太細嘅時候兩者嘅症狀未必咁明顯，不過隨住小朋友成長，特別係升學後，對小朋友嘅專注力、社交及表達能力等嘅要求及期望都相應增加，與同齡小朋友相比之下或會形成強烈對比。除咗會影響學業之外，亦可能會衍生被同學孤立或欺凌嘅問題，影響自信心之餘，更可能誘發其他情緒問題，故此建議家長及早應對。